======
هم يبكِّى وهم يضحَّك
الاعلام طالع يتمحَّك
خفَّوا شوية علينا تعبنا
راعى ضميرك راقب ربَّك
======
اللى بتعمله ست لميس
حاجة تفوق تفكير ابليس
واحدة بتكدب وبتتبجَّح
عاوزة الكل يموتوا فطيس
=====
محمود سعد دا محور غم
كل كلامه معجون سم
زى الحية كلامه الناعم
لاكن عاجنه بقنطار دم
=====
وادى الاقرع عمرو اديب
فاكرُه هينفع فى التقليب ؟
جايب قال بطاطين للفقرة
يا اخى كفاية كلام ترهيب
=====
قرَّب قرَّب يالا تعالى
فقرة جديدة لابو حمَّالة
وبيتنطط زى القردة
كل يومين تلاقيها بحالة
======
شعلل شعلل يالا يا وائل
فبرك الِّف وارمى قنابل
بس نسيت ان احنا فهمنا
عمر المصرى ما هيتقاتل
======
اوعى تقول ان انا اخوانى
ولا سلفى ولاعلمانى
انا مسلم وموحِّد ربَّى
والمولى بالعقل حبانى
======
مصر يا عالم حاجة كبيرة
مش بالشاشة هتبقى صغيرة
لازم تفهم انت وهية
ان كلامكم كدب وعيرة
======
ناصر على توفيق
2013 م