---------------------
قال الميدان يا ناس
بصرخ ومين سامع
وانا صوتى فى حشايا
مدفون ومش طالع
وبكيت من حسرتى
وهمومى ما تتلم
وجراحى من امتى
لا لاقى خال ولا عم
شامم على سكتى
رياح ملاها السم
وقلت اادى الفرض
ورحت اتوضا
وف شرع مين يا ناس
اتوضا مية بدم
قال الميدان
----------------------------------
عمرى ما كنت بخيل
وكرمى طارح ورد
فين العلم فى الايد
ف لحظة راح واتهد
والجو ماله حزين ؟
وهمومه مالها حد
حتى غناوى الناى
ما عدتش اسمعها
سامع بدالها رصاص
اعداده ما تتعد
قال الميدان
-------------------------------------
ساكن فى ليل ممدود
ونهارى تاه واتزل
شايف وطن مدبوح
ميزانه مال واختل
وازاى يعيش الفرح ؟
فى ميدان ملاه الغل
لازم يعدى الليل
مهما طال او قل
لازم يهل الفجر
متوشح بعنقود فل
قال الميدان