@ كلمة عتاب @

ــــــــــــــــــــــــــــــــــ

ممكن أقولك كلمتين ؟

بس اوعديني متزعليش !

هما مش اكتر من عتاب ،،

والعتاب ميضركيش !

،،،،،،،،،،،،،

لما اكون مشتاق اضمك ،،

والتقيكي متحضنيش !

والدموع تكوي خدودي ،،

والقى دمعي مهزكيش !

لما اقعد تحت شجرك ،،

والقى ظله مظلنيش !

أو أكون محتاج دفاكي ،،

واحس أنه مدفنيش !

أو لما اكون بردان وجسمي بيرتعش ،،

والقى شالي اللي غزلته بكل عمري مغطنيش !

وان قولتلك ليه الجفا ،،

القى جفاكي مينتهيش !

لما يفضل قلبي ينزف من جفاكي ،،

والقى نزفي مخضكيش !

لما اكون شايل همومك كل عمري ،،

والقى همي مهمكيش !

لما اكون عايش بنص القلب فيكي ،،

والنص في الغربه وبيدور عليكي ،،

واما يلاقيكي ،،، متفرحيش !

لما اكون عطشان واجيلك ،،

تتلوي ومترحبيش !

وابقى جاي مشتاق لنيلك ،،

وبسلامته ميرونيش !

طيب هاسيبك تحكمي ،

علشان اكون مظلمتكيش ،،

ممكن تقولي ازاي هاعيش ؟؟

وازاي انا هاقدر أطير ،،

إذا كان جناحي مفيهش ريش ؟؟

والا خلاص مبقاش يهمك ،،

ان كنت اموت ،،

أو كنت اعيش ؟؟

هو انتي ليه ،، مبترحميش ؟؟

هما كانوا كلمتين متحشرجين ،

وكان معاهم دمعتين متحجرين ،

حبيت اطّهر قلبي منهم ،،

قلتهم قصدي أعاتبك ،،

بس نفسي ،،،

متزعليش ........

ــــــــــــــــــــــــــــــــــــــــــــــ

عتاب / علي فرج